फिफा अध्यक्ष जियानी इन्फान्टिनो विवादमा: युइएफए र कन्काकाफद्वारा नेतृत्वको कडा आलोचना, पद छाड्न दबाब

विश्व फुटबलको सर्वोच्च निकाय (फिफा) का अध्यक्ष जियानी इन्फान्टिनो गम्भीर प्रशासनिक सङ्कट र तीव्र आलोचनाको घेरामा परेका छन्।

फिफाका प्रमुख प्रतियोगिताहरूको सेयर निजी लगानीकर्तालाई बेच्ने प्रस्तावबाट पछि हटे पनि युरोपेली फुटबल संघ (युइएफए) र उत्तर, मध्य अमेरिका तथा क्यारिबियन फुटबल संघ (कन्काकाफ) ले इन्फान्टिनोको नेतृत्वमाथि प्रश्न उठाउँदै कडा विज्ञप्ति जारी गरेका छन्।इन्फान्टिनोले प्रतियोगिताको सेयर निजी क्षेत्रलाई बेच्ने विवादित योजना फिर्ता लिने घोषणा गरेलगत्तै युरोपेली फुटबलको सर्वोच्च निकाय युइएफएले यस निर्णयको स्वागत गर्दै यसलाई “सिङ्गो फुटबल खेलको जित” भनेको छ।

तर, युइएफएले इन्फान्टिनोले सन् २०१६ मा अध्यक्ष चुनिनुअघि गरेका पारदर्शिताका बाचाहरू पूरा गर्न नसकेको र पारदर्शिताको साटो “अपरिपक्व, गोप्य र अपारदर्शी सम्झौता” जबर्जस्ती लाद्न खोजेको आरोप लगाएको छ।

“वर्तमान फिफा नेतृत्वले युइएफएको मात्र नभई फुटबल परिवारका धेरै सदस्यहरूको विश्वास गुमाइसकेको छ,” युइएफएद्वारा जारी विज्ञप्तिमा भनिएको छ।

यसैगरी, कन्काकाफले पनि इन्फान्टिनोको नामै नलिई फिफाको नेतृत्व शैलीप्रति कडा आपत्ति जनाएको छ। उसले यस कदमलाई “फुटबललाई भन्दा आफ्नो स्वार्थलाई प्राथमिकता दिने नेतृत्वको लक्षण” भन्दै फिफाको समग्र नेतृत्वको पूर्ण समीक्षा गरिनुपर्ने माग गरेको छ।

आगामी निर्वाचनअघि इन्फान्टिनोमाथि संकट

आउँदो मार्चमा हुने फिफा कंग्रेसमा चौथो कार्यकालका लागि पुनः अध्यक्षको उम्मेदवार बन्ने तयारीमा रहेका इन्फान्टिनोका लागि यो विवाद ठूलो धक्का बनेको छ। बेलायतका पूर्व मन्त्री तथा बेलायती नेता एन्डी बर्नहामले इन्फान्टिनोलाई पदबाट राजीनामा दिन सार्वजनिक अपिल गरेका छन्।

अर्कोतर्फ, सन् २०२२ को विश्वकप आयोजक राष्ट्र कतारको फुटबल एसोसियसनले भने लगानी योजना फिर्ता लिने निर्णयको प्रशंसा गर्दै इन्फान्टिनोको समर्थनमा उभिएको छ।

 नियमन र पारदर्शिताको माग

युरोप र अमेरिकाका विभिन्न देशका फुटबल सङ्घहरूले पनि फिफाको नेतृत्व र सुशासनमाथि प्रश्न उठाएका छन्। इङ्ल्यान्डको फुटबल एसोसियसन (एफए) र नर्वेली फुटबल फेडरेसनले युइएफएको कदमको समर्थन गर्दै फिफाको सञ्चालन प्रक्रिया, वित्तीय पारदर्शिता र नेतृत्वको गम्भीर समीक्षा हुनुपर्ने बताएका छन्।

फिफाका अध्यक्ष इन्फान्टिनोले भने युइएफए र कन्काकाफले लगाएका गम्भीर आरोपहरूका विषयमा अहिलेसम्म कुनै आधिकारिक प्रतिक्रिया दिएका छैनन्।