एनभीएल अक्सनः को खेलाडी कुन टिममा?

काठमाडौं। नेपाल भलिबल लिग (एनभीएल) को पहिलो संस्करणका लागि खेलाडी अक्सन आइतबार सम्पन्न भएको छ। राजधानीस्थित होटल रोयल टुलिपमा आयोजित अक्सनमार्फत सहभागी ६ टोलीले आफ्ना प्रारम्भिक खेलाडी छनोट गरेका हुन्।भदौ १२ देखि २१ गतेसम्म सञ्चालन हुने प्रतियोगितामा सगरमाथा स्म्यासर्स, मधेस वारियर्स, काठमाडौं रेड्स, अन्नपूर्ण स्पाइकर किङ्स, कर्णाली शिवराज र खप्तड फाल्कन्सले प्रतिस्पर्धा गर्नेछन्।

अक्सनमा प्रत्येक टोलीले सात–सात खेलाडी अनुबन्ध गरेको छ। त्यसअनुसार क्याटेगोरी ‘ए’ बाट चार र क्याटेगोरी ‘बी’ बाट तीन खेलाडी छनोट गरिएको हो।

खप्तड फाल्कन्स ले क्याटेगोरी ‘ए’ बाट सरोज बर्देवा (रु १ लाख २० हजार), इन्द्र विक (रु १ लाख), प्रेमप्रसाद गौतम (रु १ लाख २० हजार) र विपास थापा (रु १ लाख) लाई अनुबन्ध गर्यो। क्याटेगोरी ‘बी’ बाट नवराज थापामगर (रु ५० हजार), पारस बोहोरा (रु ७० हजार) र नवराज धामी (रु ५० हजार) टोलीमा आबद्ध भएका छन्।

कर्णाली शिवराज ले क्याटेगोरी ‘ए’ का नृपध्वज बस्नेत, बिनोदबहादुर चन्द, सुरज चुनारा र सनोज चौधरीलाई समान रु १ लाख २० हजारमा अनुबन्ध गरेको छ। क्याटेगोरी ‘बी’ बाट सन्दीप लुहार, बलराम गुरुङ र सुनिल ठकुल्ला समान रु ५० हजारमा टोलीमा आबद्ध भएका छन्।

काठमाडौं रेड्स ले बलदेवसिंह धामी (रु १ लाख), सन्तोष विक, सन्तोष राई र चिरञ्जीवी खड्कालाई समान रु १ लाख २० हजारमा अनुबन्ध गरेको छ। क्याटेगोरी ‘बी’ बाट दीपेश कुँवर (रु ५० हजार), पुस्करसिंह धामी (रु ७० हजार) र जीतबहादुर ढुंगेल (रु ७० हजार) टोलीमा समावेश भएका छन्।

अन्नपूर्ण स्पाइकर किङ्स ले क्याटेगोरी ‘ए’ बाट राजेन्द्र धामी र सुरेन्द्र खत्रीलाई समान रु १ लाख २० हजार तथा रवि केसी र विवश अधिकारीलाई समान रु १ लाखमा अनुबन्ध गरेको छ। क्याटेगोरी ‘बी’ मा विवश आले, जितबहादुर सार्की र देवरनन मगर समान रु ५० हजारमा टोलीमा आबद्ध भएका छन्।

सगरमाथा स्म्यासर्स ले भीमबहादुर गाहा (रु १ लाख), सुवास कुँवर (रु १ लाख २० हजार), रुपेन्द्र नेपाली (रु १ लाख ५ हजार) र दीपकराज जोशी (रु १ लाख) लाई क्याटेगोरी ‘ए’ बाट अनुबन्ध गरेको छ। क्याटेगोरी ‘बी’ मा रमेश बम, सन्जोग परियार र रेशम छन्त्याल समान रु ५० हजारमा टोलीमा परेका छन्।

मधेस वारियर्स ले क्याटेगोरी ‘ए’ बाट सन्तोष महता (रु १ लाख २० हजार), रामविनय यादव (रु १ लाख), धनबहादुर भट्ट क्षेत्री (रु १ लाख २० हजार) र राजन थापा (रु १ लाख) लाई अनुबन्ध गरेको छ। क्याटेगोरी ‘बी’ बाट विप्सन शाही ठकुरी (रु ७० हजार), सन्जुविक्रम शाह (रु ५० हजार) र रविन रसाइली (रु ५० हजार) टोलीमा आबद्ध भएका छन्।

पहिलो संस्करणको एनभीएलले नेपाली भलिबललाई व्यावसायिक स्वरूप दिनुका साथै खेलाडीलाई प्रतिस्पर्धात्मक अवसर उपलब्ध गराउने अपेक्षा गरिएको छ।